中環出更：施榮忻愛妻幸福晒巨鑽
秋風陣陣，入馬場消遣認真爽。上月尾註冊結婚嘅百仁基金主席施榮忻（Jaime）再度拉頭馬，舉家入場打氣，太太鄧慧琦（Jaymee）戴上五卡巨鑽婚戒，幸福滿瀉。粒巨鑽原來係老爺施子清同奶奶送嘅結婚禮物。
喺馬季開鑼先拔頭籌嘅Jaime，尋日喺沙田馬場再下一城。愛駒「愛拚者勝」出戰第六場，臨尾發力狂奔終點奪冠，帶挈主人袋逾三十八萬元獎金。Jaime話，賽前只預計馬匹有機會入三甲，趣趣哋落注幾百元，估唔到真係中頭獎。
老爺奶奶送贈
老公贏錢，老婆Jaymee興奮拍掌，右手不經意露出閃亮婚戒。原來係老爺、奶奶搵專人挑選美鑽，再鑲成戒指送畀新抱，心思十足，難怪Jaymee話唔捨得戴。
拉頭馬嘅，仲有太子珠寶鐘錶執董朱繼陶（Joseph），佢匹團體馬「天賜福星」勝出第七場，獎金逾五十萬元。Joseph笑言匹馬賠率太熱，自己落注唔多，買中亦僅袋幾百元。不過彩金事小，最緊要Happy喎。
同場仲有潮州商會會長陳幼南，佢爸爸匹團體馬「路路好」出戰第一場，佢同太太齊打氣，仲落注數十元以示支持，可惜愛駒跑「梗頸四」。唔失望嘅，下次再玩過。
卓妮