政情：克勤仔踩單車畀狗追
立法會議員近日忙於搬屋到添馬艦新大樓，而且迎新活動浪接浪，早幾日又有媒體搞咗個「去舊迎新」活動，叫議員用跑步、踩單車等方式由舊立法會去新大樓。陳克勤就抽到籤跑步去新大樓，但見其他議員踩單車，佢自己又腳痕想踩番兩轉，仲細訴自己嘅單車故事。
克勤仔一提起單車就好雀躍，話自己細細個曾經擁有一架色彩繽紛嘅BMX「愛駒」，當時佢仲住喺石塘咀舊屋村，附近冇乜踩單車嘅地方，惟有出屋外條走廊度踩，否則就去到西環貨物起卸區，鍾意嗰度夠闊落又平坦，但缺點可能會畀狗追；佢又記得試過學校搞旅行去沙田踩單車，心情勁興奮。
依家克勤仔搬咗去沙田住，樓下有單車徑，應該踩多咗單車至係，但佢話屋企冇位擺單車，附近又搵唔到泊單車位，所以少咗踩喇。之不過咁，如果解決到車位問題，佢一定會考慮買番架，再續單車夢咁話。