政情：任亮憲被打 警方仲未捉到人
十一月區議會選舉，「維園阿哥」任亮憲喺黃大仙龍上選區挑戰工聯會陳婉嫻，佢上星期做街站時無厘頭被打，其中兩個施襲者仍在逃，警方仲未捉到人。任亮憲尋日就特登去到黃大仙警署遞交請願信，之後仲同約十名支持者遊行去工聯會黃大仙地區服務處，促請警方同工聯會幫手遏止呢類事件。
揭工聯請人時薪不足28蚊
工聯會個服務處尋日休息，任亮憲將請願信插喺門口後隨即走人，點知經過工聯會塊布告板時，竟然發現貼住幾張唔夠時薪廿八蚊嘅招聘啟事，任亮憲即時取笑，話工聯會唔撐最低工資。嘩，好嚴重嘅指控喎，呢件事足證工聯會做事唔夠小心。
任亮憲尋日又話，今次向工聯會遞信，純粹因為從施襲者言談間，知道佢哋係陳婉嫻支持者，所以今次希望嫻姐發揮影響力，將兇徒繩之於法。佢又話，今次選舉其實係拚輸嚟打，但佢將來仍然會留守九龍東，希望為人民力量爭取更多支持。喺龍上選區參選嘅仲有陳偉基。