中環出更：創「無翅婚宴」 黃傑龍獲認同
新一批十大傑出青年尋日誕生，近年公職多多嘅叙福樓集團執董黃傑龍（Simon）當選。Simon去年首創「無翅婚宴」，大獲好評。今次獲選，佢話好意外。嚟緊將會開多四間新舖，擴充版圖，又積極考慮參選飲食界選委。
梁君彥悄悄提名
Simon嘅提名人係立法會議員梁君彥（Andrew），兩人結緣於稻苗培植計劃畢業禮，其後Simon當上稻苗學會主席，身為職訓局主席嘅Andrew大表欣賞，靜雞雞提名對方。
甄選過程好激烈，Simon謙稱無諗過真係獲選，家人都戥佢開心，媽媽送上Cartier手錶，平日嚴肅嘅爸爸都讚句：「你真係叻仔」，太太Olivia送上一對袖口鈕，等老公十二月頒獎禮時有得戴。
Simon不忘多謝人生路上的恩人，包括日式食肆「和民」創辦人廖傑民。兩年前齊合組公司，開拓「夏麵館」、「牛角」及「牛涮鍋」等食肆，開拓飲食王國。
Simon話，唔少父母認為讀書不成者，先會從事飲食業，今次佢獲獎，正好鼓勵更多年輕人入行。