中環出更：天佑音樂會蔡冠深鬆口氣
颱風納沙走咗唔夠一個禮拜，強烈熱帶風暴尼格又嚟。原來喺納沙吹襲香港嘅星期四，城中大忙人中華總商會會長蔡冠深急如熱鍋上嘅螞蟻，事關佢以家族企業新華集團名義贊助嘅辛亥革命一百周年音樂會，當晚喺尖沙咀文化中心舉行。好彩八號風球喺黃昏及時「降呢」，逾三百位嘉賓風雨不改現身撐場，蔡冠深（Jonathan）同太太蔡關穎琴（Janice）先至可以鬆一口氣，對天公作美不知幾咁感激。
當晚到場嘅政商界嘉賓冠蓋雲集，包括財經事務及庫務局局長陳家強夫婦、有「牛仔褲大王」稱號嘅中總副會長楊釗、亞洲聯合財務公司老細長原彰弘及囝囝長原京毅等，唔少國家嘅駐港總領事亦畀面撐場，足見Jonathan嘅交遊十分廣闊。
林瑞麟當晚好笑容似知「紮職」
當時仲未獲中央委任為政務司司長嘅林瑞麟，就以政制及內地事務局局長身份出席，佢成晚笑容滿面，似已預知好消息已近。卓妮特登趨前叫聲「司長」，睇吓佢係咪開心到神志不清，結果佢即刻笑着糾正，仲話卓妮叫錯咗添！
當晚嘅節目由香港管弦樂團擔綱演出，Jonathan全家總動員嚟撐場，囡囡Jocelyn更加落場做埋司儀，出落得幾標致嘅Jocelyn表現淡定大方，獲得唔少掌聲。
卓妮