中環出更：家己冷設宴 賀同鄉受勳
富商雲集嘅香港潮州商會向來團結，商會日前就設宴慶賀今年獲授勳嘅鄉彥，包括獲金紫荊星章嘅行會成員劉遵義、獲銀紫荊星章嘅廖創興家族新抱廖湯慧靄、獲委太平紳士嘅前東華主席馬清鏗（Patrick）等，當晚一眾「家己冷」同聲同氣，恭喜前恭喜後，歡笑聲不絕。
劉遵義派歐債定心丸
劉遵義同太太手拖手到場，有愛情滋潤，測市都樂觀過人，佢拍心口話，歐債危機遲早解決，叫大家毋須恐慌。
劉遵義係城中經濟專家，佢話近期歐債危機沒完沒了，搞到市民都驚，隨時有歐洲銀行會「爆煲」，掀起全球性金融震盪，但佢有信心歐洲政府最終可以將債務「炸彈」拆除，擺明係大派定心丸。
晚宴上，卓妮又見到廖創興家族新抱廖湯慧靄，查實佢並非家己冷，但老公就係潮州人，即係潮州新抱，所以潮州商會都當正佢係家己冷嘞。身為「潮人」嘅Patrick都係獲慶賀嘉賓之一，獲委太平紳士嘅佢心情靚爆，仲同立法會議員梁劉柔芬（蘇菲梁）傾到雞啄唔斷。Patrick爆料話，佢堂哥嘅女婿，就係蘇菲梁嘅公子，難怪兩家咁老友啦。
卓妮