政情：林婉濱區選一擊即中
今年首次參加區議會選舉嘅林婉濱話，佢無諗過贏，更無諗過可以自動當選，不過同佢傾落，佢個人又唔係咁簡單。林婉濱早前至啱啱退出自由黨，唔知自由黨有無呻笨？
林婉濱當選嘅荃灣荃威選區，一直係自由黨楊福祺嘅選區，但楊福祺到英國退休，所以索性退埋黨，留低個席位畀助理林婉濱。林婉濱話佢跟楊福祺退黨，而唔係同自由黨有咩不和。但佢就自爆報名參選前，新民黨田北辰曾經搵過佢幫手，希望拉佢入新民黨，但最後林婉濱話費事搞到關係太複雜，所以婉拒田二少嘅好意。
林婉濱開口埋口都好謙，不過佢一啲都唔簡單，佢既係唔少社團嘅成員，而且仲係國際知名嘅ＭＥＮＳＡ學會成員。入呢個學會要先測智商，過咗一定分數先可以入會。唔知係咪都計過呢個選區勝算高，先決定參選呢？