政情：CY赴富豪飯局只談民生
恒隆主席陳啟宗同新鴻基地產非執行董事郭炳湘尋晚喺快活谷馬場董事廂房設下鴻門宴，聲言讓「備選」特首嘅行政會議召集人梁振英（CY）向一班商界友好介紹吓佢嘅治港理念。CY喺晚宴後話，佢唔係嚟拉票，因為出席嘅一共廿人當中，佢都唔知有邊啲將會成為選委，佢話大家喺飯局上傾嘅係社會管治同民生問題，強調唔係拉票。
胡應湘聽完「有決定」
胡應湘話，佢話自己好耐無見CY，見有免費飯食就特登嚟聽吓意見，佢又話聽完意見「就會有決定」，又話邊個做特首，都要為香港嘅利益着想。有份請食飯嘅郭炳湘就話佢係嚟聽政綱，不時都有依啲飯局，而今次就咁啱請CY，又話飯局唔係面試，叫大家唔使咁緊張。
新世界發展董事總經理鄭家純尋日喺另一個場合，未有點名邊個係佢嘅心水特首，但佢認為，新特首必須對本港整體利益好。但佢無回應尋晚有無出席富豪飯局。
有機會出席呢個飯局嘅疑似候選人，唔止CY，佢哋遲啲都會請唐唐嚟，講吓佢心目中嘅治港藍圖。