中環出更：張華峰伉儷打風煮飯仔
都九月尾啦，立秋都過埋，卓妮都無諗過香港仲打得成風！尋日颱風「納沙」打到嚟，八號波之下風大雨大，好多人都選擇喺屋企Hea，卓妮喺屋企Hea到好肚餓嘅時候，先發現屋企無晒嘢食，惟有出去碰吓運氣，睇吓有無餐廳開門，點知咁蹺喺ifc撞到全國政協張華峰同太太兩個拍拖。卓妮原本諗住佢哋都係怕麻煩出街食飯啦，點知原來張華峰咁有情趣，趁打風同太太一齊買餸煮飯仔。八號風球都陪老婆買餸，真係打風都打唔甩！
超市買餸 有商有量
張華峰同太太兩個喺超市推住架車仔，一邊買嘢一邊傾偈，一路有商有量，好鬼恩愛，佢哋買完海鮮又買牛肉，仲有魚生同壽司。張華峰仲趁太太畀錢嘅時候走咗去買麵包，唔知係咪諗住買埋聽日早餐呢？
張華峰平時喺證券行咁鬼忙，難得尋日股市全日休市，偷得浮生半日閒。張華峰同卓妮講，見尋日打八號風球多咗一日假期，所以特登陪吓老婆Shopping喎！卓妮開頭諗住佢哋係買返去畀工人煮啦，點知張華峰話諗住趁假期自己揸鑊鏟，試吓學炒餸喎，真係唔話得！
話時話，尋日「納沙」連船都吹得郁，卓妮出街時都有啲驚被吹走，不過張太就唔同啦，拖住咁穩如泰山嘅張華峰，八號風球出街冒險都冇有怕！
卓妮