政情：孫柏文醉酒做節目？
曾經喺二○○○年參選港島區立法會選舉敗北嘅孫柏文，近年以財經人自居，經常喺電視報章講股票。前晚約十點半，肥仔文以嘉賓身份現身有線電視節目，討論近排波濤洶湧嘅環球股市，點知肥仔文語無倫次，表現異常，好彩主持人識得執生，第二節佢已消失咗，事件引起網民熱烈討論。
節目一開始，靚女主持已經好反常咁低聲問肥仔文Ready未，當另一嘉賓黃元山提到歐美股市回春，唔知係咪一個會漏水嘅水泡，主持就問肥仔文睇法。肥仔文反應有些少遲鈍，然後話「……如果係攬住個水泡嘅話，我都係要鍾意……鍾意鍾意……如果係鍾意個水泡嘅話，一定係要攬住個水泡囉！」主持見勢頭唔對，之後基本上只同黃元山對話，第二節直情飛走肥仔文。
網民議論紛紛，有人話主持一早知道肥仔文唔妥，問佢Ready未，咁點解仲畀佢出鏡呢？好彩佢冇爆粗、除褲咋，唔係仲笑死人呀。多數人估佢飲醉咗，揶揄佢抄日本官員上鏡前勁飲酒。亦有人估佢輸到傻咗。有線電視接受查詢就話，肥仔文當日身體不適，所以做咗第一節就請佢返去休息喎！