政情：跆拳女將區選撼高達
民選區議員先有機會拎到參加下屆超級區議會議席嘅入場券，令到多名已報名參加區選嘅政壇大哥大姐都畀人狙擊或挑戰，最新戲碼係葵青荔華選區競逐連任嘅「高達」李永達，將會遭到前跆拳道港隊成員朱麗玲（Ling）嘅挑戰，加上選民力量亦派出高舉「票債票償」口號嘅「慢必」陳志全狙擊高達，相信到時會有好戲上演。
有政黨尋日舉行全體女參選人誓師大會，據聞首次參選挑戰高達嘅阿Ling大有來頭，曾經係前跆拳道港隊成員，教育程度達到碩士，簡直係文又得武又得，況且有當區居民亦對每逢四年一次選舉先蒲頭嘅高達好有意見，睇嚟雙方會有一番惡鬥。
其他女參選人為突圍而出亦有花心思，畢業於演藝學院、將出選梨木樹東嘅呂迪明，就自創個「民生、民心，迪明關心」嘅口號，而將出戰興芳嘅梁嘉銘原來係「議員世家」，佢競逐連任區議員嘅父親同丈夫都有嚟撐場。已報名參選梨木樹東同興芳，分別為陳琬琛同吳劍昇。