政情：胡釗逸繼承「神探」衣鉢

曾領導港大微生物學系研究沙士、禽流感、豬流感嘅袁國勇今年決定放低系主任呢個「重任」，但仍然會留喺港大微生物學系擔任講座教授。至於新上場嘅教授胡釗逸年輕有為，九一年喺港大醫學院畢業之後，一直做咗多項有代表性嘅研究，包括全球首次發現新品種霉菌香港型橫梗霉菌，又喺國際權威醫學雜誌發表針灸消毒不足可以令病人感染惡菌甚至奪命嘅報告，夠晒「威水」。

微生物學嘅研究真係好重要，連早前患病嘅「才女」林燕妮都覺得微生物系嘅研究好困難，所以特登拎自己啲舊書去義賣，籌咗三十幾萬蚊送畀港大微生物學系做研究經費，希望盡啲綿力幫吓學術界咁話。