中環出更：吳傑莊「追星」被迫夜蒲
美元近日「拗腰」彈上，外幣跌到一仆一碌。時勢立立亂，揸住邊個國家貨幣都死。金至尊數碼行政總裁吳傑莊（Johnny）自爆三年前當金價每安士九百美元時已買金條，近年金價拾級而上，最近雖然回番少少，但仍相當和味。
話買金最保值
銀紙貶值速度驚人，Johnny認為買金最保值，如今金價翻幾番，抵佢牙擦。除咗買金，搞IT生意都係佢強項。近日「升呢」為金至尊旗下「尊1網」CEO，專為中港紅星、藝人打造產品平台，頭炮係為電影中女演員設計閃亮「月影星光」系列。日前佢贊助新戲慶功宴，香港青聯副秘書長詹勝，及會董盛品儒都嚟撐場。
咪睇小明星效應，Johnny話，紅星着過嘅衫，戴過嘅飾物，都會火速爆紅。只要加以設計，絕對係一門好生意。為斟介更多紅星加盟合作，Johnny笑言被迫夜蒲：「我習慣夜晚十一點瞓，但大明星往往三更半夜先收工，惟有深夜出動嘞。」
卓妮