政情：唐營雙林 大纜扯唔埋
大家等緊佢辭職宣布參加特首選舉嘅政務司司長唐英年有兩大得力助手，一個係有份幫自己打江山嘅家臣林大輝，另一個就係工商界老友記林健鋒，兩人喺言語間都似乎對唐營嘅部署略有所知，但偏偏又水火不容。林大輝唔加入工商專業聯盟，更見佢哋兩人互相「唔順超」已經白熱化。
有知情人士話，早前成立嘅工商專業聯盟，Jeffery（林健鋒之洋名）本來想拉攏林大輝埋班，但點知大輝即刻耍手擰頭，據聞連唐唐都冇佢符。Jeffery仲出晒口要求更有力人士幫手向大輝「娘家」廠商會嘅元老施壓，要求佢哋幫手拉線，但有力人士認為勉強無幸福，所以都係留番啲自由度畀佢。大戰當前，理應槍頭對外，但兩個同屬唐營嘅人原來好難合作。
理由冠冕堂皇唔埋班
其實工商專聯嘅組成，主觀意願係第日就無論邊個做特首，都可以輕易喺立法會取得更多支持，為政府保駕護航。今次連分裂咗嘅自由黨都可以暫時「復合」，但雙林就大纜都扯唔得埋。聽聞大輝唔加入工商專聯，有一個好冠冕堂皇嘅理由，就係佢同合作咗幾年嘅一班獨立建制派議員，即係五散人都唔打算加入任何黨或者組織。所以大輝就話自己唔加入工商專聯，先可以發揮現時角色，喺外圍幫手拉攏五散人，團結建制派嘅工商專業力量。
有知情嘅人士話，大輝同Jeffery過去有乜仇怨，大家無乜聽聞，大輝請Jeffery食咗個大檸檬，其中一個原因係佢自視好高，認為Jeffery次次都係政府最後一刻先至表態，立場唔清晰，咁樣搞法各有各做好過，所以打死都唔肯入去工商專聯。
至於日後工商專聯何去何從，知情人士就話要睇吓十月立法會開鑼後點運作。如果Jeffery夠晒號召力，可以發揮佢嘅領袖魅力，咁樣要唔成為第一大黨都好難。總之睇表現，睇造化，工商專聯開會，都無可能計劃到咁長遠。