全世界都諗緊點樣可以紓緩氣候變化，救救地球，點知早前被踢爆喺舂坎角寓所僭建天台圍欄及帳篷嘅政制及內地事務局局長林瑞麟（林D9），尋日又畀市民打上電台「篤」佢屋企安裝咗多部冷氣好唔環保。
該名市民質問林D9屋企有幾多人，為乜要安裝七部冷氣咁多呢？仲叫環境局局長邱騰華好心教育吓佢，唔該啲高官做番個好榜樣喎。
不過，有冷氣專家話，其實屋企裝幾多部冷氣都無所謂，最緊要係有冇連無人喺屋企都開着晒啲冷氣機，同埋有冇使用能源效益較佳嘅機種，仲話冷氣機散發嘅熱力可能令整體平均氣溫上升，只係造成溫室效應嘅一小部分，換言之只要用少啲電已經幫到地球。
林D9今次畀人喺大氣電波唱衰，睇怕都係拜弱勢夕陽政府所賜，市民有乜睇唔順眼，自然會抽秤吓。