政情：統計處長榮休下屬破財
港府高官退休時有發生，所屬部門舉行歡送晚會亦係平常事，但耐唔耐就會發生醜聞，最新一單係同統計處處長馮興宏榮休有關。
據聞統計處有內部文件巨細無遺列明，建議各現職同事集資畀馮興宏榮休禮物嘅金額，變相令其下屬被屈要破財送禮。現時二十一世紀居然仲有呢啲送禮文化，仲列晒表要職員因應唔同職級要做唔同銀碼嘅人情，呢個政府做其他嘢，又唔見佢咁有組織力。
員工怕日後工作遭報復
話說喺政府工作長達三十七年嘅馮興宏，將於本月二十四日退休，前兩日嘅二十二日就有歡送晚會。我哋尋日收到由署名「一群憤怒鳥」嘅投訴信，直言就馮興宏榮休晚宴同送禮安排，揭示高官嘅真面目。據聞該封題為「處長走了，同事破財了」嘅投訴信，矛頭直指統計處內各科及組嘅主管要求同事參加歡送馮興宏嘅晚會，期間各助理處長曾發出電郵層層下壓逼同事參加下，至少有三百至四百人被拉或被迫參加，以免日後工作上或人事上遭到報復。
但離譜嘅事總係一不離二，「一群憤怒鳥」喺信中話，最令佢哋氣憤嘅部門秘書公然發出電郵通告，指定各職級嘅捐獻金額，粗略估計共有幾萬元，佢哋計過馮興宏或有兩千萬退休金，送禮嘅區區小數目，不如捐畀公益金，大家先可能順氣番少少。
統計處嘅內部通告雖然講明集資購買禮物與否全屬自願性質，但附件列明建議各職級嘅集資金額，例如首長級人員係二百元、總行政主任等係一百元，況且仲引用公務員事務規例中，有關現職同事集資款項不得超過本身實職月薪嘅百分之零點五，總之做足工夫，話唔係早有預謀同大石砸死蟹都無人信喇！
老實講，部門首長退休係咪送禮應該豐儉由人，今次統計處又爆出送禮醜聞，真係令等收工嘅夕陽政府增添更多不光彩事迹，但願各個即將退休部門首長醒醒定定，否則臨退休前先爆醜聞搞衰自己個名就無癮喇！