中環出更：唐媽媽黑面唔信囝囝有外遇
特首選戰愈來愈精彩，疑似特首候選人政務司司長唐英年嘅婚外情緋聞傳遍政商界，雖然話係流言蜚語，但空穴來風未必無因，睇嚟佢遲早都要出嚟澄清吓。唐唐對參選神神秘秘，但佢媽媽唐尤淑圻就冇你咁好氣，照舊同班老友去中環High tea，當被問及囝囝嘅婚外情傳聞時，佢當堂黑面，聲言唔信囝囝會搞呢啲嘢喎。
卓妮尋日下晝三點三下午茶時間路經中環歷山大廈時，就見唐媽媽同大班朋友出現喺二樓間COVA歎茶，其中一個係富商邱德根夫人裘錦蘭，佢哋傾到指手畫腳，相當開心。傾咗一個鐘頭後，唐媽媽率先離開，沿行人天橋行過太子大廈，再過對面酒店地下等候司機接載。卓妮見機不可失，沿途同唐媽媽傾咗幾句，問佢係咪支持囝囝選特首時，佢就笑容滿臉話：「當然支持啦，自己個仔喎！」
被問及唐唐有外遇同私生子嘅傳聞時，唐媽媽一聽到，瞬間收起笑容，然後黑面，好冷漠話無聽過傳聞，仲叫卓妮自己問唐唐添！唔止呀，唐媽媽護子心切，大讚囝囝好乖，相信囝囝唔會做啲咁嘅嘢，又話囝囝好錫老婆仔女喎。
冇同新抱傾過
唐媽媽身為婦協副主席，唔知會否覺得為人丈夫有外遇唔係幾好呢？卓妮又問唐媽媽有冇同新抱郭妤淺傾過唐唐有婚外情嘅傳聞呢？唐媽媽就好緊張話，自己從來冇同新抱傾過呢單嘢，而囝囝亦冇同佢講過有呢啲嘢喎。所以話啫，母愛真係好偉大，可以不問情由咁撐個仔！
卓妮