政情：王敏剛渡海有心有力
闊別三十三年嘅維港渡海泳將會喺下個月十六日復辦，業餘游泳總會義務秘書王敏超連月來積極籌備比賽，希望可以延續呢個昔日嘅國際盛事。王敏超係游泳健將好多人都知道，但原來佢嘅大佬、港區人大代表王敏剛都係渡海泳嘅好手。佢喺六十年代就已經參加過三次渡海泳，有次仲攞過第五名添！
今屆維港渡海泳尋日試水，已報名參加嘅王敏剛就喺四十一分鐘內游完一千五百米，成績尚算唔錯，但佢就好謙話自己年紀大，今次比賽只不過係純粹參與，挑戰吓自己喎。佢又話，自己平時有做開運動，對個人身體狀況好有信心，相信到時應該可以順利完成賽事。
回想三十年前參賽，王敏剛話當年有好多外國人專登搭飛機來港參與呢項一年一度嘅盛事，如今可以再喺香江暢泳確係一個好難得嘅機會，相信如果往後可以繼續舉辦嘅話，盛況應該不減當年喎。