政情：關愛扶貧唐唐冇作為
夕陽政府施政劣迹斑斑，多名社會人士尋日就喺電台節目數臭政府扶貧不力，堂堂大都會竟然仲有籠屋、棺材房，百幾萬窮人更加係度日如年，到依家先至有個關愛基金扶貧幫補吓，但身為主席嘅政務司司長唐英年分分鐘辭職唔撈選特首。不過，多個關愛基金嘅非官守委員對唐唐離職一啲都唔覺可惜，仲踢爆唐唐大半年以來都冇乜作為，聲言「有冇佢喺度都係咁上下」，真係好行夾唔送。
關愛基金委員之一嘅社區組織協會主任何喜華，尋日喺電台節目《香港家書》話，煲呔曾上任以來，一直喺「無風無浪且高薪厚職下安然度過，但對於百多萬貧窮人口而言，可謂度日如年。」力斥政府咁多年來喺長遠房屋政策、人口老化及扶貧各方面都冇作為咁話。而社聯亦批評政府用行政措施計算貧窮率，令貧窮人口數字同實際出現巨大落差，根本冇決心扶貧。
好似唐唐揸旗嘅關愛基金，基金嘅福利小組委員會主席周永新就不諱言，唐唐過去大半年對於基金運作影響唔係好大，只係開過幾次個多鐘頭嘅會議，好多決策都係小組委員會決定，真係邊個做主席都一樣。
「佢唔好插手仲好」
不過，唔知係咪因為唐唐無能，周永新不但冇投訴唐唐唔做嘢，仲話：「佢（唐唐）唔好插手仲好呀！」明寸唐唐可有可無，阻住個地球轉。
肥胡挺唐被寸黐線
何喜華亦話，有傳唐唐辭職選特首，會由政制及內地事務局局長林瑞麟（林D9）頂上，佢話林D9對基層冇認識，唔覺得林D9會對社福界友善，反而擔心會有政治用心。講到特首選舉，何喜華就寸爆另一關愛基金委員胡定旭幫唐唐倒米，佢話：「（胡定旭）話佢（唐唐）腳頭好都得，黐線㗎，咁搵個算命佬咪得囉！」簡直係侮辱選舉咁話喎。