中環出更：梁永祥自嘲唔識寫履歷
恒生前高層梁永祥（William）離開個人銀行業務主管一職後，去向未明，據聞唔少獵頭公司正向佢招手。William日前以演藝學院校董會主席身份出席文化界十‧一酒會時，就賣關子話正努力搵工，可惜已經十幾年無寫求職信，依家寫起嚟生疏咗好多，連一份簡單CV（履歷）都唔記得點寫喎。
唔打銀行工嘅William，生活依舊忙，除咗抽空出席酒會外，仲有唔少老友爭住請食飯，飯局排到密麻麻，仲忙過返工。William係零售銀行業務專家，稱得上係打工皇帝。一離開恒生大碼頭後，獵頭公司紛紛主動敲門，但佢笑言「Options Open」，即係持開放態度，真係唔憂嫁。
最想打好高球
William此刻最想做嘅，反而係打好高爾夫球，佢語帶風騷話：「最想年底前可以減四桿，即係打到九十二桿，咁就Good嘞！」咁悠閒嘅生活，真係令人羨慕。