中環出更：鄭錦鐘拉頭馬「享耆成」
大暑過後，馬季開鑼又令一眾馬迷血脈沸騰，繼全國政協委員施子清一家喺馬季開鑼日拉頭馬威威後，前晚首場快活谷賽事上，保良局副主席鄭錦鐘（Eric）愛駒「享耆成」亦勇奪冠軍。今次Eric穩袋約五十一萬元獎金，加埋私人落注，認真和味，難怪Eric笑逐顏開，仲叫聲愛駒做「成哥」添，又同太太及千金鄭泳妮一齊開香檳慶祝。
目標百萬挑戰賽
Eric匹「享耆成」成績一向唔錯，上季沙田煞科賽拉頭馬後，前晚再下一城大熱勝出。不過，Eric志不在此，事關依家馬會正舉行「百萬挑戰賽」，累積分數最高嘅三匹馬，其馬主將可瓜分一百萬港元獎金，冠軍馬主可得到六十五萬元添！Eric雄心壯志話，希望「成哥」奪得「跑馬地狀元馬」，計埋今次頭馬，佢已經累積咗十五分，要達到目標相信冇難度。