政情：眼科醫生區選挑戰阿涂
民主黨立法會議員涂謹申早兩日宣布，嚟緊十一月區議會選舉會喺新區奧運區出選。雖然阿涂係星級戰將，屬於建制派嘅自由黨將會派出眼科專科醫生劉啟傑（Vincent）打算同阿涂對撼，律師對醫生，相信都會成為焦點之一。
奧運選區選民好多都係中產人士，去得呢啲區作戰，專業背景基本上必不可少。Vincent話，自己入黨已經五年幾，落咗奧運區已經兩年幾喇，笑言自己唔算係空降，不過亦慨嘆，專業人士要抽身落區認真唔容易。
一直以來，參加直選嘅醫生比較少，Vincent好記得有一次，自己約好晒地區人士食飯，點知咁啱有一位眼睛不斷流血嘅病人嚟求診，所謂醫者父母心，Vincent冒住失去地區人士支持嘅危機，決定救咗人先，嗰次約會雖然遲到，但佢問心無愧，相信地區人士亦唔會怪佢喎。