中環出更：怪醫做老襯 娶新聞之花
尋日除咗係「追月」之外，仲係醫學界立法會議員怪醫梁家騮（KL）嘅大喜之日，佢同相識八年嘅女朋友關天燕（Cannas）拉埋天窗，喺尖沙咀洲際酒店筵開六十席，政商界及醫學界等各方好友齊到賀。KL同Cannas一踏入會場，全場情緒High爆，新郎一身純白色燕尾服配金色領巾，令人眼前一亮，新娘就以極之甜美嘅笑容答謝賓客到臨。
大讚又靚又叻
卓妮問KL點解當年第一眼見到做傳媒嘅Cannas印象咁深刻？佢好直接答話：「靚女吖嘛！佢係新聞之花嚟架！」仲大讚新娘子好叻女。對於好多人話KL多年來拍拖收得好埋，KL就回應話，拍拖有好多灰色地帶，有時好難分清楚幾時先係正式拍拖喎。
尋晚婚禮星光熠熠，嘉賓包括全國人大常委范徐麗泰、醫管局主席胡定旭及行政總裁梁栢賢、衞生防護中心總監曾浩輝、立法會議員方剛及KL嘅幾個「散人」兄弟，包括工業界林大輝、保險界陳健波及資訊科技界譚偉豪，但就獨欠會計界陳茂波。大家都祝福一對新人，最重要係「早生貴子」。
林大輝話，佢早就感覺到一對新人有過電，記得當年喺施政報告之前，一眾議員同助理喺隔籬房開會，佢就留意到KL同當時任職議員助理嘅Cannas眉來眼去，有種異常嘅磁場交流喎。佢仲話自己閱人無數，一定唔會睇錯，果然真係畀佢貼中咗。
KL如今有着落，但仲係「鑽石王老五」嘅曾浩輝就未有下文，卓妮問幾時輪到佢請飲？佢就笑笑口話：「諗下先，你有介紹記得搵我喇！」真係識講笑，如果佢開聲，肯定排晒隊。
卓妮