一個人嘅花名，唔多唔少都會反映外界對佢嘅印象。好似政制及內地事務局局長林瑞麟咁吖，花名有得你叫係林公公，外界對佢嘅印象好極有限啦。
呢嗱嗱嗱，政務司司長唐英年最近多咗一個新花名，叫做唐垃圾，事關呢一位疑似特首候選人口沒遮攔發表「垃圾論」，結果反而自己被揶揄為垃圾。既然有一個咁難聽嘅花名，你估外界對於唐唐有乜嘢印象吖嗱？講多無謂，參考民意。
港大民意研究計劃最新民意調查顯示，對比於一個月之前，唐英年民望明顯下跌，支持度評分係四十六點六分，跌三點四分。至於支持唐唐嘅比率咯喎，只有百分之三十，急跌四個百分點。反對率呢？百分之三十一，升五個百分點。既然反對率高過支持率，即係民望再變負數。
所以話啫，從政最忌衰多口，偏偏唐英年一大特色係口舌招尤。仲記唔記得唐唐詛咒八十後「車毀人亡」呀？又記唔記得堂堂一位司長取笑外地遊客「吊吊揈」呀？至於嗰一次將昂坪三六○直譯為Ngon Ping Sam Luk Ling，低能無疑係低能，不過相對而言已經叫做冇咁犯眾憎。
三司十二局之中，另一個民望暴跌嘅係保安局局長李少光，支持率急挫十個百分點至五成二，反對率由百分之九，倍增至兩成一，急升十二個百分點，淨支持率合計插水式暴跌二十二個百分點。李局長之所以民望插水，好大可能同副總理李克強訪港期間保安過嚴有關。
李少光都算嘞，唐唐民望跌到嘔其實好大問題。你知啦，呢一位唐氏綜合症患者盛傳係下屆特首人選之一，若果一不小心阿爺欽點佢黃袍加身，香港咪會出現一個不孚眾望嘅特區總舵主？到時咯喎，新禮賓府主人睇怕雞犬不寧。
功夫茶記得，曾蔭權取代董建華之初，民望高到得人驚嘅八成支持率，跟住落嚟拾級而下，終於跌到家陣只有百分之二十四嘅殘局。冇辦法，呢家嘢叫做「民望有跌無升定律」，視乎跌得快定係跌得慢咁解，連美國總統奧巴馬都逃不出魔咒。假設唐唐以三成支持率上台做特首，又假設佢順順利利做完五年一任，支持率會唔會跌到零㗎？係就醜死怪咯！
計功夫茶話齋，唔理邊個係疑似特首候選人，首要急務係爭取「制高點」。冇番咁上下高民望，何德何能做特首呀？五年悠悠長又點樣捱得過民望跌到趴街呀？如果唐唐勇者無懼選特首，功夫茶送上九字真言：小心車毀人亡吊吊揈！