政情：政府借「膠樽」蓋黑影
立法會保安事務委員會尋日召開第二次特別會議，繼續討論國務院副總理李克強訪港期間嘅警方保安安排，警務處一哥曾偉雄再次到立法會迎戰，但上次佢發表嘅「黑影卡手論」引起全城嘲諷，政府為免立法會內火頭四起加上「黑影」幢幢成為焦點，臨急臨忙叫勞工及福利局局長張建宗出嚟，講下鼓勵就業交通津貼計劃嘅進展，明顯就係借「膠樽」嚟掩蓋黑影。
點解咁講？勞福局尋日無端端喺十二點半通知記者，話張建宗喺唔夠兩粒鐘之後嘅兩點三見記者講下新交津進展，專登早過立法會保安事務委員會少少，結果佢真係對計劃嘅詳情無具體交代，要留番禮拜五先講，仲要求其答咗幾條問題就急急腳走人。佢同記者講話有關文件已經交咗畀立法會，但立法會就一直未上網，連議員都未收到，打聽之下先知立法會因為中秋提早收工，趕唔切將文件畀議員同上網，總之錯漏百出，今次張建宗真係夠晒義氣！