政情：范太評林D9民望較低

范太尋日喺電台講到下任CS誰屬時，佢話重點係市民是否認為嗰啲疑似班底係有心嘅能人，至於近日坊間講到嘅CS大熱係政制及內地事務局局長林瑞麟，范太直情笑笑口形容林D9「好努力做佢份工，不過客觀事實係佢民意支持比較低」。

范太一方面對林D9民望低似乎有所「嫌棄」，但對佢認為未來特首嘅可接受人選、現任CS唐英年，佢又唔係咁講喎。佢話唐唐民望低，當中確有受到煲呔曾所累嘅因素，而有啲官員受到拖累嘅影響無咁大喎。范太挺唐得嚟，又唔反對多過一位建制派參選，事關佢認為不能強求和諧，夾硬唔畀其他人選，其他人心裏面可能會唔舒服㗎嘛。

下任CS人選亦可引來一番討論，港區全國人大代表王英偉話，林D9係教育局局長孫明揚後資歷最深嘅政務官，暗示林D9倘若換個政府崗位工作或會更好。