政情：夏佳理替補叫兩飛
全國人大常委范徐麗泰暗示自己會棄選特首，特首選戰旋即形成政務司司長唐英年同行政會議召集人梁振英（CY）之爭嘅局面，二人辭職準備打埋身戰只係時間問題，唐、梁辭職後懸空嘅公職自然要填補，據聞本身有一定政治能量嘅行政會議成員夏佳理（Ron），叫胡成為行會召集人同西九管理局主席，但究竟阿Ron會否成為政治大紅人，就要睇佢嘅一念之間喇。
香港政壇本月熱鬧非常，政商界熱議下屆特首人選，CY仲講到明會「備選」特首，故未有太多人留意阿Ron突然粒聲唔出接受電台訪問，期間阿Ron既講夕陽政府最後一份施政報告嘅意見，同時又講下屆特首班底嘅重要性意見，但事後隨即傳出，阿Ron大有機會替補勢必會辭職參選特首嘅CY，做埋行會召集人剩餘嘅大半年任期。
冇政團包袱
眾所周知，行會召集人需要一定嘅政治能力，環顧現屆行會成員，可以勝任嘅人選不出阿Ron、工聯會會長鄭耀棠（棠哥）、鄉議局主席劉皇發（發叔）三人，但棠哥同發叔有政團領導嘅包袱，行會召集人亦未試過畀有政治背景中人出任，相對中立又做過議員嘅阿Ron，自然成為熱門繼任人選。況且阿Ron以前喺立法會有Bill王之稱，佢埋頭審議好多條例草案，又懂政治，從來好少講錯嘢惹起爭議。
正所謂「一不離二」，阿Ron一係唔替補，唐唐喺西九董事局主席嘅職務，亦有很大機會要阿Ron執手尾。阿Ron係西九發展委員會主席，而且做港交所主席等敏感嘅任命都算做得頭頭是道，替補坐正成為西九董事局主席亦係順理成章嘅事。
阿Ron因唐梁二人勢必辭職而成為「替補之王」，事前真係無人估得到，但正所謂「政治一日都嫌長」，最終阿Ron能否成功叫胡，其個人意願當然要考慮，但更多嘅係政治因素出發考慮，大家要拭目以待喇！