中環出更：霍震宇打呔最緊要啱Feel
成功男人嘅正式衣着，總係逃不出灰黑藍嘅魔掌，想穿出個人品味及心情，全靠領呔畫龍點睛。霍英東集團董事霍震宇個性沉穩有禮，出席莊重場合至愛深色領呔，早前佢出席一個招商活動時，就戴咗條法國名牌Lanvin格仔靚呔，呔面滿布有深有淺嘅灰綠藍等冷色方格圖案，莊重中帶些調皮輕鬆，原來係佢精心挑選嘅至愛。
代表性格心情回憶
霍震宇講起打呔心得，好有見地。佢話，男人如果冇咗條呔配襯，就好似缺少啲嘢，領呔唔止代表一個人嘅性格，亦都代表當時心情。例如出席莊重場合要戴深色呔，輕鬆場合就戴顏色鮮艷嘅領呔；領呔又代表一個回憶，例如係特別日子或者特別朋友送嘅，又或者出外旅行時買嘅，一穿戴起佢就諗起往事或故人，所以零舍有感覺。
當日佢穿戴嘅Lanvin靚呔係自己買嘅，卓妮問佢係咪有一段特別嘅回憶，佢笑而不答，只係勁讚條呔質地好靚，又容易打理，所以買咗六、七年，愈戴愈鍾意。