詹培忠屢挑釁學生被寸爆

斥學生文革式批鬥

詹培忠會上多次針對三名學生，例如指事發後的港大燭光集會猶如文革式批鬥大會，不停批鬥校長徐立之，港大生李成康強調當日徐立之是自願出席，無人強迫，被「批鬥」後更與學生聲言支持捍衞港大言論自由：「以我所知文革就唔係自願被人批鬥。」詹又批評學生要求立法會引用特權法調查事件是浪費公帑，李成康隨即反駁，監察政府是立法會的職責！「詹議員對立法會職能嘅看法，可能同公眾有小小差距！」

詹培忠其後再質疑個別學生有政黨背景，但沒有申報。理大黃佳鑫即以言還擊，強調自己無任何政黨背景：「但如果議員要我申報，我陣間慢慢報，幼稚園玩過咩組織都會報。」

詹培忠寸學生不成，改為向委員會主席涂謹申「開拖」，批評他「揸住雞毛當令箭，以為你係（國務院副總理）李克強呀？」涂即反擊：「我唔使你教我點做！如果我係李克強，已經捉晒你哋走啦！」廠商會議員林大輝其後加入戰團，指涂的說法有醜化領導人意思，並用疑似黑社會的口脗道：「希望你小心啲講嘢，唔好亂講嘢！」

「六四T恤男」黃健亦在會上激動發言，炮轟警方設立核心保安區做法荒謬。「我係業主，你喺我屋企設保安區，有冇通知我？有冇得我同意？」「我屋企廁所、睡房係咪都可以變成核心保安區？」