政情：神秘飯局 四星耀目 下屆財爺此中尋？
現任財政司司長曾俊華炮製出史上最廢預算案，之後派六千蚊補鑊又搞到一鑊泡，相信無論下屆政府由邊個做特首，都唔會搵佢續任，至於應該由咩人接任，財經界最近亦有愈來愈多討論。上個禮拜就有人搞咗個財經界神秘飯局，一圍枱就坐咗四位疑似下任財爺人選，席間仲有人打晒開口牌，話要喺度幫下屆特首揀蟀添！呢四個人係邊個？咪就係前金融管理局總裁任志剛、前商務及經濟發展局局長馬時亨、前恒生副董事長兼行政總裁柯清輝，以及佢嘅下手，現任恒生一姐梁高美懿囉，真係粒粒皆星，個個都夠晒分量。
十二名工商同專業界立法會議員早前合組工商專業聯盟，成為立法會單一最大政團，外界揣測其中一個功能就係幫下屆特首箍票同埋班。呢個財經界神秘飯局，正正係由工專聯嘅召集人林健鋒發起。出席者除咗四位疑似下任財爺，仲有一直瞓身力撐某位疑似特首候選人嘅全國政協常委陳永棋。據聞有出席者一坐低，餸都未點齊，就笑言下任財爺嘅合適人選都差不多喺齊度，唔使再周圍搵喇！
夠晒資格 只怕沉船政府
報料人話，其實根據佢個人嘅了解，任總現時貴為中國金融學會執行副會長，地位超然，相信唔會重返特區政府做第三把交椅咁屈就。另一前高官肥亨，佢現時出任中策集團主席，喺財經界長袖善舞，完全冇動機重返政府呢個熱廚房，加上佢當初係以健康理由中途離開政府，依家好難自圓其說話突然好番晒，相信機會亦不大。
至於柯清輝同梁高美懿，報料人話佢兩個只要肯做，下屆特首一定飯應，又提到仲有一位冇出席神秘飯局嘅財經界名人，其實亦夠晒資格做下任財爺，佢就係滙豐亞太區行政總裁王冬勝。不過最近爆出嘅滙豐大幅裁員風波，令王冬勝成為眾矢之的，出任財爺嘅行情難免受影響。
不過疑似財爺候選人當然要睇吓下任特首係邊一個，同有乜辦法將現時特區政府嘅民望起死回生。一個搭沉船嘅政府，能幹嘅人都避之則吉喇，仲邊會自動獻身同個政府攬住一齊死？