政情：陳淑莊斥曾偉雄高竇
區議會選舉下星期就接受提名，身兼中西區山頂區議員嘅立法會議員陳淑莊（Tanya），近日經常喺山頂蒲頭同街坊揮手，佢爆料話山頂高官名人雲集，唔少高官揸車返工時，見到佢都會禮貌點下頭、報以微笑，唯獨有人隻眼生係額頭度，次次都扮見佢唔到，呢個人就係警務處處長曾偉雄喇。
Tanya話，佢見盡唔少高官車出車入，好似勞工及福利局局長張建宗咁，就算Tanya唔會投票支持佢，佢都會好有禮貌同Tanya打招呼，但曾偉雄就好唔同，連招呼都唔打個。話初頭諗住可能係曾偉雄睇唔到佢啫，但試過三次都係咁，即係唔係巧合，係故意啦！
既然對方當自己透明，Tanya都唔同對方客氣，每逢見到曾偉雄架車，嗰一刻都會自動成為佢嘅「飲水位」或「休息位」。講起區選，佢坦言今年所背負嘅壓力，仲大過○七年區選，因為當年佢只不過係小試牛刀，輸咗都無咩所謂，但今次要競逐連任有一定難度，聲言自由黨會出盡全力撼佢喎。