政情：泛民自摑轉撐委任制
區議會選舉快將進入埋身肉搏階段，各黨派成敗除咗直接影響地區勢力外，亦關乎擁有話事權嘅區議會主席寶座。當中一直係建制派天下嘅東區區議會，主席丁毓珠（珠姐）已連續三屆獲政府委任，主席神話始終要終結，好大機會由擔任副主席嘅民建聯（民記）鍾樹根坐正。據聞會內處於弱勢嘅泛民主派，最近就罕有發短訊挽留珠姐，避免主席之位落入民記手中。
鍾樹根坐正機會大
珠姐在位主席十二年，主持會議不過不失，能夠平衡建制派與泛民之間嘅利益，所以就連較為激進嘅社民連「阿牛」曾健成都被佢馴服，阿牛仲試過獲邀到內地考察添，確係受寵若驚。不過，當珠姐卸任後，形勢可能逆轉，泛民議員擔心民記鍾樹根坐正後，佢哋嘅聲音會被打壓，連帶申請撥款都未必咁順利，到時就會更加被邊緣化，所以最近有傳聞佢哋想挽留珠姐留任。
不過，泛民一向聲嘶力竭反對區議會委任制，更狠批夕陽政府遲遲未公布取消區議會委任制細節，估計政府想喺區選後先至公布，靈活調配委任議員到各區，以掌握各區會嘅主導權，以便為政府重大政策保駕護航。如果今次泛民為咗唔想主席之位落入民記手中，反而去撐一個委任議員做主席，確係自打嘴巴，同當日中西區區議員甘乃威支持委任議員胡楚南做副主席冇分別。
尋日係東區區議會喺換屆前最後一次會議，亦係珠姐最後一次主持大局，屋宇署署長區載佳、社會福利署署長聶德權及渠務署署長陳志超都有出席。雖然佢哋冇出口擦珠姐鞋咁露骨，但親自到場都算好畀面，叫做同珠姐餞行，加上早前珠姐獲頒授金紫荊星章，所以今次都算係榮休，尋晚就喺太古城一間酒樓舉行榮休晚宴，相信佢未必如泛民所願而留低。
珠姐臨別依依話，東區係個大區，佢同四十幾個區議員一齊解決咗好多地區民生問題，覺得好開心，好有滿足感，所以要離開都好唔捨得，尋日佢就帶咗啲茶葉嚟送畀一班好同事。珠姐又話，以後會多啲時間陪屋企人，歎吓最愛嘅普洱茶，享受吓人生。不過，相信珠姐都不愁寂寞，皆因佢喺教育界多年，可以繼續作育英才，得閒搞吓婦女會工作，為人生展開新一頁。