政情:方亮瑜睇風水 不忘進修

我哋早前講過,自由黨青年團開創蒲吧論政嘅先河,一班後生仔女喺輕鬆環境下無所不談,當中做堪輿學家嘅「黨花」方亮瑜(Jade),見到熟人總會贈番兩句。原來阿Jade係港大文學院畢業,曾經做過中學英文教師,近年就疊埋心水全職做堪輿學家,但佢幾忙都會抽時間去進修,認真好學,絕對係政圈嘅明日之星。

阿Jade話,人生匆匆幾十年,要趁後生學多幾樣嘢充實自己,將來同客人傾偈都多啲話題。難怪佢讀完中醫課程,又考埋個金融經紀牌後,近期仲話要去考個地產經紀牌照添!至於點解佢會考金融經紀牌,原來好多搵佢批命嘅客人都有投資股票,經常都畀貼士佢,但佢聽聽吓都係覺得求人不如求己,自己做埋分析穩陣啲喎。

阿Jade做咗堪輿學家後,高峰期試過每日要走三至四場,生意滔滔,雖然忙到一頭煙,但佢依然抽時間不斷進修,呢份好學不倦嘅決心確係值得年輕人學習。

「Money18免費即秒股票報價網站」現推出8升級功能,財經資訊,實時實發!