去年三月八日，剛啱係三八婦女節，有一位消防隊目殉職。死者名叫楊俊傑，享年四十七歲，絕對英年早逝。
消防隊目因乜事幹壯烈犧牲嘅呢？人人都想知道答案，所以東區裁判法院就展開死因研訊嘞。經過一連串舉證與陳詞，死因庭陪審團一致裁定，去年長沙灣麗昌工廠大廈四級火，消防隊目楊俊傑殉職係死於意外。死因裁判官陳碧橋表示，楊俊傑因為救火救人而過世，令人感到難過，對佢嘅家人致以哀悼。
難過之餘，死因庭向消防處建議，所有消防員進入火場之時必須嚴格遵守安全程序，消防員每年嘅體能測試不應豁免，消防控制中心人員不應處理日常九九九來電。
唉，意外意外，又係死於意外，即係冇人要為死者負責。對於呢一個裁定，功夫茶反而唔覺得係意外。大家記唔記得土瓜灣馬頭圍道死人冧樓，死因庭又係裁定四名遇難者死於意外？裁判官雖然批評屋宇署測量師巡查大廈嘅工作態度敷衍塞責，之但係唔算得上係誤殺，並未構成刑事罪行，所以屋宇署冇變做追究對象。
呢嗱嗱嗱，如果你問功夫茶，功夫茶一定認為屋宇署係間接元兇，正所謂咯喎，我雖不殺伯仁，伯仁因我而死。不過可惜吖，香港嘅死因庭往往只係問你點樣死，不問責任到底誰屬，到頭來一個二個害人精逍遙法外。
不如聽聽楊俊傑胞兄結案陳詞嘅時候係點樣講吖。楊兄話呀，消防處要為胞弟殉職負責，處方延誤十八分鐘先至將火警升為三級，令形勢急轉直下。另外，個人警報器經常誤鳴，而且多名消防員忘記啟動，反映前線人員同管理層對裝備期望有重大偏差。楊兄仲狠批，○八年嘉禾大廈大火已揭示無線電通訊有佔線問題，消防處今年先至改善。
冇錯，一如土瓜灣死人冧樓，你可以話消防處同樣唔算得上係誤殺，並未構成刑事罪行。問題係，消防處如果冇為消防員提供適當裝備以及訓練，係咪難辭其咎呀？
裁判官之所以建議消防員每年嘅體能測試不應豁免，原來係咁嘅，荔枝角消防局局長梁國柱作供時表示，楊俊傑因為體能成績好，所以○六至一○年獲豁免每年一度嘅體能測試。到頭來，法醫認為楊俊傑事發前已患有可致命嘅冠心病，嚴格而言死因係心臟病發。如果有體能測試，會唔會救番佢一條命呢？唔該消防處處長盧振雄好好反省。
總而言之，消防員被裁定死於意外唔應該係消防處卸責藉口，必須好好警惕，從速改善裝備，消防殉職一個都嫌多吖！