旅遊發展局台北辦事處尋日正式升格為分公司，港府派出商務及經濟發展局局長蘇錦樑（Greg蘇）、旅遊事務專員容偉雄及香港旅遊發展局主席田北俊一齊主持開幕禮。原本係件開心喜事，但係儀式竟然閉門舉行，唔開放畀記者採訪，職員推搪嘅藉口百變，最終激怒當地傳媒，認真失禮人。
講起呢單鬼鬼祟祟嘅開幕儀式，旅發局嘅處理方法好令人費解，面對記者詢問，解釋更加反覆不一。初初辦事處人員拒接電話，後來接電話後，聲稱因為Greg蘇係高官，所以不便邀請傳媒。後來又改稱，因Greg蘇行程緊湊，無時間接受採訪。眾記者群起抗議後，職員改稱可拍照，但不能訪問。
台灣傳媒怒不可遏，最後田少解畫話，因場地太小，恐怕大批記者到場會令秩序失控，所以先至有咁嘅安排。開幕儀式搞到七國咁亂，真係丟晒香港嘅架！