政情：肥亨撐港大生示威無罪
港大禁錮學生風波至今仍未平息，學生同校友繼續追究警方責任。同樣係港大畢業嘅商務及經濟發展局前局長馬時亨話，見到母校將百周年校慶呢件好事變成唔開心嘅事，感到好可惜，佢話自己以前做局長時都曾經接過唔少示威者嘅請願信，所以覺得就算畀國家領導人見到示威，都唔係一件失面子嘅事喎。依家連前高官都咁講，今次警方真係唔衰攞嚟衰。
肥亨話，作為港大校友都想母校形象好啲，學生開開心心，今次搞成咁，估計係大家溝通出咗問題。佢又話，香港一向都多示威，係香港嘅文化，一個城市有一個城市嘅規矩，示威都係一種表達方式。講到囡囡就快出嫁，肥亨開心到笑騎騎，佢話囡囡同未來女婿之所以揀咗Boxing Day結婚，因為未來女婿喺嗰幾日生日，諗住結婚同生日一齊慶祝，好事成雙喎！