政情：星級家長到聖保羅收風
近日城中名校陸續舉行小一入學簡介會，吸引眾多廿四孝父母頻撲出動。尋日輪到聖保羅男女中學附屬小學，約二千名家長到場聆聽，場面墟冚。呼吸系統專科醫生梁宗存同太太黃德如、藝人劉曉彤都有現身，劉曉彤囝囝後年至升讀小一，佢提早咗成年嚟打聽，夠晒緊張。
梁宗存夫婦亦誠意可嘉，事關佢哋去年亦有現身簡介會，為當時讀緊K2嘅囝囝攞定資料。明年囝囝就正式升讀小一，尋日佢哋提早咗成粒鐘到場。黃德如喺會後話，心情好興奮，佢好認同學校優質辦學同對學生品德培育嘅原則喎。
近年淡出螢幕嘅劉曉彤，現時育有一仔一女，囝囝今年四歲，囡囡只得三歲，佢話提早一年嚟學吓嘢，依家未有決定，周圍去聽吓簡介會先。講到點樣培養囝囝，佢話囝囝都有學吓游水、打波同美術等，咁一個月學費咪要好多錢？佢發揮搞笑本色話：「十萬九千七啦！」