政情：新政府總部與世隔絕
煲呔曾為一己私欲，以長官意志強迫工人為添馬艦新政府總部日夜趕工，趕到裙拉褲甩至今大致完工，可惜金玉其外，敗絮其中，外貌看來整整齊齊，但內裏卻甩甩漏漏。繼早前發現有滲水外，呢幾日陸續入伙嘅政策局中人亦發現，新政府總部範圍內嘅手提電話訊號極之微弱，接收得一格訊號變成等閒事，令新總部形同孤島難以同外間無障礙溝通，對於以資訊流通自居嘅香港簡直係笑話。
網絡商急補鑊
呢幾日有搬入新總部嘅政府中人爆料，話喺新總部用手提電話打出打入電話並唔容易，因為多個電話網絡供應商嘅訊號都收得麻麻哋，據講有某個供應商嘅訊號更加奇差，長時間只係收到一格訊號，絕對係離晒大譜同不可接受。據聞多個電話網絡供應商收到投訴後都知衰，即時諗下有乜嘢辦法補鑊，包括立即派人到新總部加快鋪設發射及接收訊號裝置。
新總部嘅電話網絡訊號搞到一鑊泡，睇怕喺毗鄰嘅新立法會大樓亦唔好得去邊，如果到時政府有重要條例需要係立法會投票通過，到時政府嘅「狗仔隊」因為電話網絡唔穩定，搵唔切班建制派議員投票支持，咁就真係喊到無謂喇！至於各大傳媒機構，如果因為電話網絡唔穩定，未能及時搵議員就某些重大議題回應，到時又係會怪罪喺政府身上。
其實自上月中正式開幕後，負面消息一直籠罩新總部，有專家發現新總部名為「門常開」，其實就「水常滲」，又曾有警員為安檢踩線差錯腳墮樓重傷，為新總部流下「第一滴血」；另又曾發生兩批共五名裝修工人，疑因趕工鋪設渠蓋時「趕出火」而爆發集體打鬥等，依家又爆出電話訊號弱雞醜聞，真係鑊鑊新鮮鑊鑊甘，所以話心急易出錯就係咁解。