政情：中環出更：大孖沙揼水 撐博鰲青年論壇
香港菁英會每年重頭戲「博鰲青年論壇（香港）」，本月十五日喺會展揭幕，尋日就開記召預告有乜節目。撞啱通脹升溫，租場費同講者機票錢都加咗唔少，菁英會主席洪為民（Witman）話，幸好今年獲大孖沙「揼水」，好似華懋集團、南豐集團等，而廖創興家族後人兼菁英會執委廖偉麟，更私人科水贊助，認真唔話得。
今年第三屆論壇將以「轉型中的亞洲經濟與社會：青年人的使命和角色」為題，就教育、互聯網及文化產業等範疇，同年輕人對談。今年請來近二十位講者，包括亞洲開發銀行副行長Bindu N.Lohani、微軟全球副總裁張亞勤、科大校長陳繁昌、西九文化區管理局M+行政總監李立偉，仲有著名導演高志森等，組合新穎，相信會擦出唔少火花。
洪為民敲門搵贊助
常務副主席楊華勇承認，今年論壇主打年輕人，相比以往以經濟金融為賣點，較難搵到贊助，好彩班兄弟夠齊心，加上Witman親自四出敲門搵贊助，最終完成任務喎。