中環出更：鍾建民印度攀山遇阻滯
本港攀山好手鍾建民上個月又遠征成功，不過今次印度攀山之旅出現小阻滯，原來佢原本想攀嘅嗰座山位置太敏感攀不得，搞到鍾Sir要臨時變動行程，只能望這山攀那山，仲攀咗兩座山咁多添。
挑戰目標位置敏感
鍾Sir上個月抵達印度列城，諗住挑戰奴不拉山谷，點知當地遠征公司領隊同鍾Sir講，由於奴不拉山谷鄰近印度、巴基斯坦及中國邊境，地理位置敏感，因此即使有特區護照同簽證，都唔畀鍾Sir攀登，鍾Sir非常驚訝，質疑點解喺香港傳真資料畀遠征公司時，無人出過聲。
鍾Sir當然唔想空手而回，結果十五日內先後成功征服海拔六千一百幾米高嘅Stok Kangri同埋六千四百幾米高嘅Kang Yatse，雖然唔係最初嘅目標，但鍾Sir喺高山拉起香港區旗時，一樣笑得咁開心。