星期六因乜事幹咁多人參加「反鷹抗暴」大遊行？哦，無他嘅，綽號禿鷹嘅警務處處長曾偉雄最近鷹氣逼人吖嘛，一方面派出超級警力鎮壓港大，另一方面又上立法會發表「黑影論」，鬼聲鬼氣講到好似撞鬼一樣，最頂癮係遮擋記者鏡頭嘅警員居然話自己隻手卡住，要求「畀番隻手我」。大遊行其中兩句口號足以說明一切：警權無限大，人權被出賣。
警權踐踏人權就聽得多，原來連海關都加入野蠻行列。所以話啫，暴政一如病毒，係會人傳人交叉感染㗎，小市民唔去大聲疾呼抗暴都唔得。
海關點樣踐踏人權呢？有一位身穿Ｔ恤熱褲嘅女士阿欣，日前由深圳灣口岸返港之時被截停，女關員懷疑佢身上藏有毒品，將佢帶到搜身房要求裸體調查。呢嗱嗱嗱，剝光豬搜身呢家嘢已經係非常之咁有侮辱成分，人權組織不斷批評警方濫用職權，點不知海關都鍾意搞呢一種侵犯私隱嘅「睇肉活動」。
事主阿欣當時極之唔願意就範，後來迫於無奈讓步，佢除咗胸圍扯高上衣畀女關員檢查。哈，女關員咁都唔收貨，仍然要求脫去上衣檢查，又話完成上半身檢查之後，要除埋熱褲剝光豬搜身。好人好姐梗係不肯屈服啦，阿欣斷然拒絕並且要求向女關員嘅上司投訴。
事情發展到呢度，有人擺明玩嘢，女關員竟然帶處於「真空狀態」嘅阿欣，走到接近公眾通道嘅另一個房間同一個男上司交涉。喂，任由一位冇戴胸圍嘅女性當眾走去見一條麻甩佬，心智稍稍正常都覺得你缺德啦！
阿欣雖然深感受辱，不過仍然據理力爭，可惜得到男主管一句令人憤怒嘅回覆，佢話喎：「全世界嘅海關都可以裸體搜身！全世界都係咁！」阿欣始終不肯讓步，雙方僵持兩個小時，跟住就發生一宗不可思議嘅奇怪事件，海關人員突然改變態度容許阿欣離開。
海關本來兇神惡煞話要剝光豬搜身，當人哋企硬又可以改變態度，咁係咪話裸體調查根本就係可有可無？咁又係咪證明小市民抗暴完全有道理？
計功夫茶話啫，好心海關唔好咁無理取鬧啦，踐踏人權好容易犯眾怒㗎，萬一畀人告到甩褲就肉鬼酸啦！
唉，諗諗下真係悲哀，香港話就話奉行一國兩制，之但係執法者愈來愈似中國公安。今時今日仲可以夠膽大大聲「維護人權」，以後會唔會將「維權人士」等同「犯罪分子」㗎？所以你唔怪得示威者愈來愈激，鬼叫暴政之下必出暴民咩！