喺通脹壓力下，消防處高官嘅職銜都出現通脹情況，消防總長（ＣＦＯ）最近鬼祟改咗名，叫做助理處長（簡稱ＡＤ），令該處突然多咗七個ＡＤ。消防處個官網九月起突然冇晒ＣＦＯ，原來佢哋全部變晒ＡＤ，但佢哋對下一級，即係副總長（ＤＣＦＯ），又完全無變，都幾奇怪，變成有副無正。
喺消防人員非官方網上討論區都有人講呢單嘢，話啲阿Sir今次要印過晒啲卡片。有一位智慧型網民就話，無聊改職銜，係覺得原本嘅Chief Fire Officer唔夠高級，處長聽起上嚟高級啲，咁樣諗真係天真同自卑。其實Chief唔緊要，做嘢唔Cheap自然得到人哋嘅尊重！
消防處發言人表示，今次唔係改名，職級對內無變，都係叫總長，但對外因為好多人唔清楚總長係首長第二級，所以對外就改稱助理處長。呢啲咁嘅架構，真係得佢哋自己至明白。