政情：陳茂波囝囝避過英暴動
香港唔少市民都會將仔女送去外國讀書，英國就係其中一個熱門地點，不過英國早前接連發生街頭暴亂，場面都幾觸目驚心，搞到唔少本港家長不知幾擔心，不過會計界立法會議員陳茂波（Paul）就唔使驚嘞，因為佢嘅囝囝James已經學成返港，唔使再留喺英國。
阿Paul個仔James讀書好叻，早幾年入讀著名學府牛津大學讀法律，原來James已經啱啱畢咗業回港，所以冇受到呢次暴動影響。阿Paul分析，今次英國之所以搞成咁，其中一個原因係英國過於側重金融業，當經濟持續不景，又未能適時轉型，人民生活苦，結果搞到暴亂。
阿Paul話，香港雖然亦以金融業為主，但勝在有內地做後盾，相信不致步英國後塵，不過世事有利亦有弊，內地經濟不斷起飛，人民幣不斷升值，港元同美金掛鈎就日漸縮水，就連身為會計師嘅阿Paul都笑言無晒辦法，仲話都想有人教佢抗通脹良方添。