政情：鄧焯謙靠「手語」幫街坊
天水圍區住咗唔少內地移民，雖然呢班街坊嚟咗香港好多年，但有啲仲係唔識講廣東話，令到想服務佢哋嘅地區人士頭都痕。好似已經喺天晴邨服務咗三年有多嘅工聯會鄧焯謙（謙仔）咁，試過因為有街坊識聽唔識講廣東話，雞同鴨講下只好靠做手勢溝通，相當尷尬。
謙仔同一班義工，定期都會為區內長者免費剪頭髮，佢話，天晴邨有一位婆婆雖然落咗嚟香港好多年，但只識講福建話，有次佢想知幾時有得剪髮，但大家唔明佢表達啲乜，搞一輪後婆婆終於豎起兩隻手指扮鉸剪，大家終於明白佢想點，場面都幾得意。
咪睇謙仔高高瘦瘦，其實佢平時不知幾喜歡踢波，不過做咗地區工作後就被迫放棄呢個嗜好嘞，計一計原來已經兩年冇踢波，佢笑言忙完呢排之後，最希望可以激烈咁踢番場比賽，表演吓腳法咁話。服務咗社區咁耐，謙仔最感動係不時收到街坊親手整嘅食物，上個端午節就收到唔少街坊親手包嘅糉，仲話大家都食得好開心添。