政情：陳克勤畀邱騰華「起底」
大黨派嘅立法會議員都趕尾班車開設議員辦事處，為該黨嘅疑似區議會參選人造勢，其中陳克勤尋日喺沙田碩門開設第九個議辦，仲邀請咗環境局局長邱騰華（Edward）出席撐場，明眼人都睇得出佢力撐喺當區服務嘅碩門興建骨灰龕關注小組嘅黃冰芬喇。
山長水遠入到嚟沙田嘅Edward發言時為要畀面主人家，特登事前查下典籍睇下「克勤」呢兩個字嘅出處，發現源自五、六千年前大禹治水，然後大讚克勤進入議會中工作好投入。
面對Edward嘅「誇讚」，克勤當然受落。Edward如果有時間去查典籍讚人，不如睇下有咩地方可以做得好啲好過喇！Edward喺○七年水鬼升城隍做局長時，起初大家都對佢做好環保工作有所期待，但幾年時間過去，空氣質素指標○九年檢討後至今都未推出新嘅指標，即使之前成功推動停車熄匙政策，但都慘被「剝光豬」先獲得通過，膠袋稅又做到唔湯唔水，佢猛咁落嘴頭讚人，都冇乜用喇。