中環耳目：陳靜薇臨別 歎星級點心
建設銀行係唔少散戶嘅愛股，幫建行融入香港出咗唔少力嘅前建行董事會香港辦事處主管陳靜薇（Agnes）最近啱啱辭咗職，決定暫別香江，到加拿大陪一對子女讀書，認真係廿四孝媽咪。臨別前佢專登到港麗酒店嘅米芝蓮食肆金葉庭歎至愛星級點心，事關下次再食到咁美味嘅地道美食，至少要等到年底喇！
改良精緻粵菜聞名
香港職業女性工作能力高，又識得享受生活，Agnes就係其中表表者，佢曾任「婦女動力基金」主席，係名副其實嘅叻女。多年來出入中環，Agnes對區內中西美食如數家珍，已經開業廿一年嘅金葉庭，以改良精緻粵菜聞名，至啱佢嘴刁嘅高要求。當日佢柯打咗豆漿梅菜叉燒包、蒜泥白肉及魚湯雲吞，回味無窮。
Agnes嘅一對龍鳳胎正喺加拿大升讀大學，Agnes話要去陪佢哋兩年，順便畀自己時間停一停腳步，聞吓玫瑰花香。仲話兩年後，唔排除重返香江，再戰江湖。