中環出更：變形金剛之父細說玩具情
生長於玩具世家，係好多小朋友嘅夢想。立法會議員林健鋒（Jeffery）就係咁幸福啦！事關佢爸爸係有「變形金剛之父」稱號嘅永和實業創辦人林亮，所以Jeffery自細就喺玩具堆中長大，真係恨死人。
早前卓妮同Jeffery傾開生意經，佢透露唔少玩具業經營秘辛。原來做呢行想長做長有，至緊要接有電影配合一齊出嘅定單來做，而且角色要夠多，例如高達、變形金剛及星球大戰等，故事入面嘅角色多、武器多，自然長做長有啦！
Jeffery近年全情投入公職，愈來愈唔得閒打理家族生意，好彩囝囝林凱章已返公司幫手，祖孫三代仲經常現身公開場合。
憑黃色小鴨打敗日本
林伯投身玩具業逾六十年，係行業嘅老前輩。佢同卓妮回憶起當年，簡直係一部活生生嘅歷史書，任何細節、年份及人物，佢都可以記得清清楚楚，確實令人佩服。
林伯最津津樂道嘅一段輝煌歷史，就係靠一隻黃色塑膠鴨仔打敗日本仔。原來林伯經歷日本侵華嘅切膚之痛，好痛恨日本人。
六十幾年前，當時玩具十之八九係日製，林伯建議當時嘅永新塑膠廠，以新材料聚氯苯烯壓製鴨仔，取代日本以易燃塑料「賽璐珞」製造嘅鴨仔，結果呢一仗打沉日本人，從此開啟香港塑膠玩具新時代。唔講唔知，原來林伯都係民族大英雄添！
卓妮