政情：孫公神秘物業愈揭愈多

有報道話孫公名下有個物業，就係位於西環第三街一四七號嘅地舖及地庫，由孫氏家族於一九五五年購入，當年作價僅三萬六千元，最近更有代表接觸孫公家人洽談出售，但有代理估計受興建西港鐵線嘅影響，料收購價將高達二千八百萬元，與購入價比較，升咗七百幾倍，升值潛力相當驚人。據聞現時該地舖以一萬三千多元筍價出租。

孫父留畀孫仔孫女

我哋尋日五點左右去現場睇過，咁啱撞到兩位女士喺該地舖行出嚟，煞有介事話乜嘢都唔知道，但經打聽後應該係做花籃定單生意。孫太鍾小芬接受我哋查詢時話，佢同孫公都冇過問呢件事，因為孫公嘅父親已經把該物業畀咗啲孫仔孫女，估計可能冇乜特別就將物業擺咗喺度喎！

話時話，孫公都唔係首次被揭有神秘物業，好似早前以註冊業主身份出售跑馬地黃泥涌道一個住宅單位，經查證後先知孫公係以遺囑執行人身份作為註冊業主賣出有關單位，其實個單位係屬於孫公家族物業，並由成個家族嘅第二代共同管有。至於孫公仲有幾多不為人知嘅神秘物業未曝光，真係一個謎，數目可能多到嚇你一驚。

還記得早前鄉議局主席兼行政會議成員劉皇發，被踢爆名下公司參與多間樓宇買賣，但遲遲無向行會申報，備受各界質疑。不過，今次孫公嘅情況有啲唔同，相信佢亦只係以遺囑執行人身份持有有關舖位，並不涉及個人利益，應該唔使申報。