中環出更：林建康遊英倫親子樂
悠長暑假結束，學生哥都收拾玩樂心情重返校園，城中一眾廿四孝父母終於鬆一口氣。愛沙尼亞共和國駐港名譽領事林建康（Matthew）同太太林黃寧艷，早前就趁暑假帶大仔孝勇、細仔孝政去倫敦玩足兩星期，跟住又返林太家鄉新加坡探親，一家四口利用暑假盡享親子樂，不知幾開心。
林太話，孝勇新學年升讀拔萃男書院小學五年級，功課壓力好大，估計有排冇得去玩，所以暑假期間叫埋親友齊齊歐遊英倫。
住郊區自置大屋
期間佢哋住喺倫敦郊區嘅自置大屋，零舍舒適。林太好着緊囝囝嘅教育，話就話玩足兩星期，但係孝勇同表妹就參加當地嘅科學工作坊，由朝早九點到下午三點，為期一星期，透過趣味方式去認識科學新知，夠晒充實。
Matthew同太太曾經喺英國讀書，舊地重遊特別有Feel，節目安排豐富精彩，包括坐小型飛機遨遊天際、品嘗米芝蓮星級食肆、行街購物，幸福盡在不言中。