政情:工聯被指做無良僱主

法定最低工資廿八元喺五月一日生效,勞工界都金睛火眼睇住有冇無良僱主剋扣僱員工資,但最近有投訴卻矛頭直指工聯會會長鄭耀棠領導嘅非牟利團體樂群社會服務處,其轄下社企「千色服式」張貼廣告聘請多名熟手車衣工,要求每日工作九小時,但日薪只有二百元,平均時薪只有二十二點二元,質疑冇畀足法定最低工資廿八元水平。

有關指控倘若屬實真係可大可小,工聯會分分鐘變無良僱主。製衣服飾從業員協會主席蕭翠芳話,最初有人向佢查詢有關廣告時,以為有工友收唔到法定最低工資,但經了解後其實只係冇及時更換招聘廣告單張,強調佢哋一直都有跟足法例畀足最低工資。另有知情人士話,由始至終佢哋放喺勞工處嘅廣告都合乎最低工資嘅法例要求。

「Money18免費即秒股票報價網站」現推出8升級功能,財經資訊,實時實發!